ಮರಿ ಕಾಕುಳ್ತಿಚಾ ಮಾಯೆಚಿ ಫಿರ್ಗಜ್, ಮಂಜೇಶ್ವರ್

ಫಿರ್ಗಜ್ ಚರಿತ್ರಾ 

ಮಂಜೇಶ್ವರ್ ಮರಿ ಕಾಕುಳ್ತಿಚಾ ಮಾಯೆಕ್ ಸಮರ್ಪುನ್ ದಿಲ್ಲಿ ಇಗರ್ಜ್ ಮಂಗ್ಳುರ್ ದಿಯೆಸೆಜಿಂತ್ ಆಸ್ಚ್ಯಾ 124 ಇಗರ್ಜಾಂ ಪಯ್ಕಿ ಏಕ್ ಜಾವ್ನಾಸಾ. ಕೇರಳ ರಾಜ್ಯಾಚಾ ಕಾಸರಗೋಡ್ ಜಿಲ್ಲ್ಯಾಂತ್ ಮಂಜೇಶ್ವರ್ ತಾಲೂಕಾಂತ್ ಆಜ್ ಉಬಿ ಆಸಾ. 

ಪೋರ್ಚುಗಿಸಾಂಚೆಂ ವ್ಯಾಪಾರ್ ಕೇಂದ್ರ್ ಆಸ್ಲ್ಲ್ಯಾ ಮಂಜೇಶ್ವರಾಂತ್ ಫ್ರಾನ್ಸಿಸ್ಕಾನ್ ಯಾಜಕಾಂಚಾ ಪ್ರಭಾವಾನ್ 16ವ್ಯಾ ಶತಮಾನಾಂತ್ ಕ್ರಿಸ್ತಾಂವ್ ಭಾವಾರ್ಥ್ ಸ್ವೀಕಾರ್ ಕೆಲ್ಲಿಂ ಮೊಗ್ರಾಂಚಿಂ ಕುಟ್ಮಾಂ ಆಸ್ಲ್ಲಿಂ. ತಾಂಕಾಂ ಮಾಗ್ಣೆಂ ಕರುಂಕ್ ಮಾಗ್ಣ್ಯಾ ಸಾಲ್ ಆಸ್ಲ್ಲೆಂ. ತರೀ ಯಾಜಕ್ ಹಾಂಗಾಸರ್ ವಸ್ತಿ ಕರಿನಾತ್ಲ್ಲೆ. 18ವ್ಯಾ ಶತಮಾನಾಂತ್ ಹಾಂಗಾಸರ್ ಇಗರ್ಜ್ ಜಾಲಿ ಮ್ಹಣ್ ದಾಖ್ಲೆ ಸಾಂಗ್ತಾತ್.

ಹಾಂಗಾಚೊ ಲೋಕ್ ದುಬ್ಳೊ, ಕೂಲಿ ಕಾಮಾಂಚೊ. ಮಾಸ್ಳಿ ಪಾಗ್ಚಿ ತಾಂಚಿ ಪ್ರಮುಖ್ ವ್ಯಾಪ್ತ್. ಥೊಡೆ ಕೃಷಿ ಕರ್ತಾತ್. ಮಂಗ್ಳುರ್ ಥಾವ್ನ್ 25 ಕಿ.ಮಿ. ಪಯ್ಸ್ ಆಸೊನ್ ದರ್ಯಾಚಾ ತಡಿರ್ ಆಸ್ಲ್ಲ್ಯಾಪರಿಂ ಇಗರ್ಜ್ ಆಸಾ. ಎಕಾ ಕುಶಿನ್ ಅರೇಬಿಯನ್ ದರ್ಯೊ ಆನ್ಯೇಕಾ ಕುಶಿನ್ ಪ್ರಕೃತೆಚಿ ಸೊಭಾಯ್ ಇಗರ್ಜೆ ಭಂವ್ತಿಂ ಪಳೆತಾಂವ್. ಇಗರ್ಜೆಚಿ ವ್ಯಾಪ್ತ್ 12 ಕಿ.ಮಿ. ಬಡಾಜೆ, ಕುಂಜತ್ತೂರು, ಉದ್ಯಾವರ ಹೊಸಬೆಟ್ಟು, ಬಂಗ್ರ ಮಂಜೇಶ್ವರ, ಮಜಿಬೈಲ್, ಹೊಸಂಗಡಿ, ಕೆದಂಬಾಡಿ, ಪಶ್ಚಿಮಾಚಾ ಕುಶಿನ್ ಅರೇಬಿಯನ್ ದರ್ಯೊ, ಉತ್ತರಾಕ್ ಮರಿಯಾಶ್ರಮ್, ಪೂರ್ವಾಕ್ ಪಾವೂರ್, ದಕ್ಷಿಣಾಕ್ ವರ್ಕಾಡಿ, ಮಿಯಪದವು, ಉದೆಂತಿಕ್ ಮಂಗ್ಳುರ್ ದಿಯೆಸೆಜ್. ಹಾಂಗಾಸರ್ ಸರ್ವ್ ಜಾತಿ-ಕಾತಿಂಚೊ ಲೋಕ್ ವಸ್ತಿ ಕರ್ತಾತ್. ಹಿಂದೂ 50%, ಮುಸ್ಲಿಂ 45%, ಕ್ರಿಸ್ತಾಂವ್ 5% ಆಸಾ.

ಮಂಜೇಶ್ವರ್ ಮರಿ ಕಾಕುಳ್ತಿಚಾ ಮಾಯೆಕ್ ಸಮರ್ಪುನ್ ದಿಲ್ಲಿ ಇಗರ್ಜ್ ಸುರ್ವೆರ್ ಪಾನಿರ‍್ಚೆಂ ಏಕ್ ಕೊಪೆಲ್ ಜಾವ್ನಾಸ್ಲ್ಲೆಂ. ಪಾನೀರ್ ಥಾವ್ನ್ ಪಾದ್ರ್ಯಾಬ್ ಹಾಂಗಾಸರ್ ಯೇವ್ನ್ ಕ್ರಿಸ್ತಾಂವ್ ಕುಟ್ಮಾಂಚಾ ಅತ್ಮೀಕ್ ಬರೆಪಣಾ ಖಾತಿರ್ ವಾವುರ್ತಾಲೆ. ತವಳ್ಚೊ ಪಾನೀರ್ ಫಿರ್ಗಜೆಚೊ ವಿಗಾರ್ ಜಾವ್ನಾಸ್ ಲ್ಲ್ಯಾ  ಮಾ| ಬಾ| ಪಾಸ್ಕಾಲ್ ಮಸ್ಕರೇನ್ಹಸ್ ಹಾಣಿಂ ತ್ಯಾ ಕಾಳಾರ್ ಕಮಾಸ್ತಾರ್ ಪೋರ್ಟ್ ಆಫಿಸರ್ ಅಧಿಕಾರಿ ಜಾವ್ನಾಸ್ಲ್ಲ್ಯಾ ಕೊಡಿಯಾಳ್ ರುಜಾಯಾಂತ್ಲ್ಯಾ  ಶ್ರೀಮಾನ್ ಜೋಸೆಫ್ ರೊಜಾರಿಯೊ ಹಾಂಚಾ ಸಹಕಾರಾನ್ ಮಂಜೇಶ್ವರಾಂತ್ ಪಯ್ಲೆಂ ಕೊಪೆಲ್ ಬಾಂದ್ಲೆಂ. ಶ್ರೀ.ಜೋನ್ ಮೊಂತೇರೊ ಹ್ಯಾ ಕೊಪೆಲಾಚೊ ಪಯ್ಲೊ ಗುರ್ಕಾರ್.

ಚಡಾವತ್ ಲೋಕ್ ಕೃಷಿ ಅವಲಂಬಿತ್ ಜಾವ್ನಾಸ್ಲ್ಲೆ. ಥೊಡೆ ಮಾಸ್ಳಿ ಪಾಗುಂಕ್ ವೆತಾಲೆ, ಹೆರ್ ಬೀಡಿ ಬಾಂದುನ್ ಆಪ್ಲೆಂ ಜೀವನ್ ಕಾಡ್ತೆಲೆ. ಚಡಾವತ್ ದರ್ಯಾ ತಡಿರ್ ಮಾಡ್ ಆಸೊನ್ ನಾರ್ಲಾಂಚಿ ಕೊಬ್ರಿ. ತಶೆಂಚ್ ತೇಲ್ ಕಾಡ್ತೆಲಿಂ. ಹೊ ಆದಾಯ್ ಪಾವನಾತ್ಲ್ಯಾ  ಖಾತಿರ್ ಮಂಗ್ಳುರ್ ಶಹರಾಕ್ ವಚುನ್ ವಿವಿಧ್ ಕ್ಷೇತ್ರಾಂನಿ ವಾವುರ್ತಾಲೆ. ತ್ಯಾ ಕಾಳಾರ್ ಲೊಕಾಕ್ ಶಿಕಾಪ್ ಉಣೆಂ ಆಸ್ ಲ್ಲ್ಯಾನ್ ತಾಂಕಾಂ ಆಸ್ ಲ್ಲೊ ಜಾಗೊ ದೂದ್ ಆನಿ ಮ್ಹೊಂವ್ ಜಾವ್ನಾ.

ಪಾಟ್ಲ್ಯಾ ಶೆಂಬೊರ್ ವರ್ಸಾಂಚಿ ಚರಿತ್ರಾ ಪಳೆಯ್ಲ್ಯಾರ್ ಸುಮಾರ್ 20 ಯಾಜಕಾಂನಿ ಹ್ಯಾ ಫಿರ್ಗಜೆಂತ್  ವ್ಹರ್ತಿ ಸೆವಾ ದಿಲ್ಯಾ ಆನಿ ಸಬಾರ್ ಕಾಮಾಂಯ್ ತಾಂಚಾ ಮುಖೇಲ್ಪಣಾರ್ ಜಾಲ್ಯಾತ್.

1919-1932 ಮಾ| ಬಾ| ಜೆ. ಎಮ್. ಮಿನೇಜಸ್.

1932-1935 ಮಾ| ಬಾ| ಲಿಗೋರಿ ಜೆ. ಲೋಬೊ.

1935-1936 ಮಾ| ಬಾ| ರಫಾಯೆಲ್ ಪಿಂಟೊ.

1936-1937 ಮಾ| ಬಾ| ಪೀಟರ್ ವಲೇರಿಯನ್ ಗೊನ್ಸಾಲ್ವಿಸ್.

1938-1945 ಮಾ| ಬಾ| ಪೀಟರ್ ಡೆಸಾ.

1938ವೆರ್ ಆಯಿಲ್ಲ್ಯಾ ಮಾ| ಬಾ| ಪೀಟರ್ ಡೆಸಾ ಹಾಣೆಂ 1939ವೆರ್ ಇಗರ್ಜೆಚಾ ಬಾಂದ್ಪಾಕ್ ನವೆಂ ರೂಪ್ ದಿಲೆಂ. ಇಗರ್ಜೆಚಾ ಮಧ್ಲ್ಯಾ ಭಾಗಾಚ್ಯೊ ವೊಣದಿ ವಯ್ರ್ ಉಬಾರುನ್ ವಯ್ರ್ ಆನ್ಯೇಕ್ ನವೆಂ ಪಾಕೆಂ ಕೆಲೆಂ.

1946-1956 ಮಾ| ಬಾ| ಜೆ. ಪಿ. ನಜ್ರೆತ್.

1957-1959 ಮಾ| ಬಾ| ಎ. ಮಥಾಯಸ್.

 1959-1965 ಮಾ| ಬಾ| ಎ. .ಸಿ ಅರನ್ಹಾ.

 1965-1965 ಮಾ| ಬಾ| ಎಲೋಶಿಯಸ್ ಫುರ್ಟಾಡೊ.

1965-1966 ಮಾ| ಬಾ| ಜೋಸೆಫ್ ನಿಕೋಲಸ್ ಲೊಬೊ.

 1966-1969 ಮಾ| ಬಾ| ಆ್ಯಂಡ್ರೂ ಪಿಂಟೊ.

 1969-1979 ಮಾ| ಬಾ| ಜೂಲಿಯಾನ್ ಡಿಮೆಲ್ಲೊ.

1969 ಇಸ್ವೆಂತ್ ಆಯಿಲ್ಲ್ಯಾ ಮಾ| ಬಾ| ಜೂಲಿಯಾನ್ ಡಿಮೆಲ್ಲೊ ತಾಂಚಾ ಆವ್ದೆಂತ್ ಲೊಕಾಂನಿ ಸಾಂಗಾತಾ ಮೆಳೊನ್ ಇಗರ್ಜೆಚಾ ಆಲ್ತಾರಿಕ್, ತಾಬೆರ್ನಾಕ್ಲಾಕ್ ಆನಿ ವೊಣದಿಕ್ ಪೈಂಟ್ ಕಾಡಯ್ಲೊ. ಇಗರ್ಜೆಚಾ ಜಾಗ್ಯಾಕ್ ನವ್ಯಾನ್ ದೊರೊ ಘಾಲೊ.

1979-1989 ಮಾ| ಬಾ| ಬಾಪ್ ಲಿಯೊ ಕುಟಿನ್ಹೊ.

1979 ಇಸ್ವೆಂತ್ ಆಯಿಲ್ಲ್ಯಾ ಬಾಪ್ ಲಿಯೊ ಕುಟಿನ್ಹೊ ತಾಂಚಾ ಆವ್ದೆಂತ್ ಫಿರ್ಗಜೆಕ್ ಆದಾಯ್ ಚಡಂವ್ಚ್ಯಾಕ್ ನವಿಂ ಬಾಂದ್ಪಾಂ ತಾಣಿಂ ಉಬಾರ್ಲಿಂ. ತೊಂದ್ರೆ, ಧೊಶಿ ದಿಂವ್ಚ್ಯಾ ಫಿರ್ಗಜ್ ವೊಕ್ಲಾಂಕ್ ಕೊರ್ಟಾ ಮಾರಿಫಾತ್ ಪರಿಹಾರ್ ದಿಲೊ. ಗರ್ಜ್ ಆಸ್ಚ್ಯಾ ಉದ್ಕಾಚಿ ವ್ಯವಸ್ಥಾ ಕೆಲಿ. ಇಗರ್ಜೆಚಾ ಸಾಂಕ್ತುವಾರಿಕ್ ಶ್ರೀ ಜೂಲಿಯಾನ್ ವಾಸ್ ಆನಿ ಕುಟ್ಮಾಚಾ ಆಧಾರಾನ್ ಮೊಜಾಯ್ಕ್ ಫ್ಲೋರಿಂಗ್ ಕೆಲೆ. ಇಗರ್ಜೆಂತ್ ಲೊಕಾಂಕ್ ಬಸೊಂಕ್ ಬಾಂಕ್ ಕರಯ್ಲೆ. ಫಿರ್ಗಜೆಚಾ ಕ್ರಿಸ್ತಾಂವ್ ತಶೆಂಚ್ ಅಕ್ರಿಸ್ತಾಂವ್ ಚಲಿಯಾಂಕ್ ಶಿಕೊಂಕ್ ಏಕ್ ‘ಟೈಲರಿಂಗ್ ಸೆಂಟರ್’ ಸ್ಥಾಪನ್ ಕೆಲೆಂ. ಹ್ಯಾಚ್ ವೆಳಾರ್ ತಾಣಿಂ ಸಬಾರ್ ಕೊಂಕ್ಣಿ ಕಾದಂಬರಿ ತಶೆಂಚ್ ಇಗರ್ಜ್ ಮಾತೆಕ್ ಸಂಬಂಧ್ ಜಾಲ್ಲೆ ಜಾಯ್ತೆ ಬೂಕ್ ಬರಯ್ಲೆ. ಹಾಂತು ಪ್ರಮುಕ್  ಕಾದಂಬರಿ ಜಾವ್ನಾಸಾ  "ಇಗರ್ಜೆಂತ್ ಖುನ್". ತಾಂಚೊ ಸ್ವಂತ್ ದುಡುಯೀ ಇಗರ್ಜೆಚಾ ಬರ‍್ಯಾ ಕಾಮಾಕ್ ತಾಣಿಂ ಖರ್ಚಿಲೊ. ಅಶೆಂ ತಾಂಚಾ ಮಿನತೆನ್ ಇಗರ್ಜೆಚಿ ಆರ್ಥಿಕ್ ಸ್ಥಿತಿ ಮ್ಹಸ್ತು ಸುಧಾರ್ಲಿ.

1989-1995 ಮಾ| ಬಾ| ಹೆರಿ ತಾವ್ರೊ.

ಮಾ| ಬಾ| ಹೆರಿ ತಾವ್ರೊ ಏಕ್ ಗಾವ್ಪಿ ಆನಿ ಹಾರ್ಮೊನಿಯಾಂ ಖೆಳ್ತಾಲೆ. ಭುರ್ಗ್ಯಾಂಕ್ ಅತ್ಮೀಕ್ ರಿತಿನ್ ವಾಗೊಂಕ್ ತಾಣಿಂ ಮ್ಹಸ್ತು ಮ್ಹಿನತ್ ಕಾಡ್ಲ್ಯಾ. ಭುರ್ಗ್ಯಾಂಕ್ ಕಂತಾರಾಂ  ಶಿಕಯ್ತಾಲೆ. ತಾಂಚಿ ಭಲಾಯ್ಕಿ ಬರಿ ನಾತ್ಲ್ಲಿ ಜಾಲ್ಯಾರಿ ತಾಂಚ್ಯಾ ತಾಂಕಿ ಪುರ್ತೆಂ ಕಾಮ್ ಹಾಂಗಾಸರ್ ಕೆಲಾಂ. 

1995-1996 ಮಾ| ಬಾ| ಬ್ಯಾಪ್ಟಿಸ್ಟ್ ಮಿನೇಜಸ್.

ಮಾ| ಬಾ| ಬ್ಯಾಪ್ಟಿಸ್ಟ್ ಮಿನೇಜಸ್ ಹ್ಯಾ ಫಿರ್ಗಜೆಂತ್ ಕೇವಲ್ 11 ಮಹಿನೆ ಮಾತ್ರ್ ಆಸ್ಲ್ಲೆ. ತಾಂಚಿ ಮಟ್ವಿ ಸೆವಾ ತರೀ ಹ್ಯಾ ವೆಳಾರ್ ತಾಣಿಂ ಏಕ್ ಕ್ರಾಂತಿಚ್ ಉಠಯ್ಲಿ ಮ್ಹಣ್ಯೆತ್. ಲೊಕಾ ಥಂಯ್ ಶೆಳೆಲ್ಲೊ ಭಾವಾಡ್ತ್ ಜಿವೊ ಕೆಲೊ. ಫಿರ್ಗಜೆಂತ್ ಎಕ್ವಟಾಚೆಂ ಭಿಂ ವೊಂಪ್ಲೆಂ. ಯುವಜಣಾಂಕ್, ಫಿರ್ಗಜ್ಗಾರಾಂಕ್ ಲಿತುರ್ಜೆಂತ್ ಆನಿ ಹೆರ್ ಕ್ಷೇತ್ರಾಂನಿ ತರ್ಭೆತಿ ದಿಲಿ. ಇಗರ್ಜೆಚಾ ದುರಸ್ತೆಚೆಂ ಆನಿ ನವೀಕರಣಾಚೆಂ ಕಾಮ್ ಧೈರಾನ್ ಹಾತಿಂ ಘೆತ್ಲೆಂ. ಲೊಕಾಚಿ ಉರ್ಭಾ ಸೆವೆ ದ್ವಾರಿಂ ಚಿಂತ್ ಲ್ಲ್ಯಾ ಪ್ರಾಸ್ ಚಡ್ ವೇಗಾನ್ ಜಾಲಿ.

1996-1997 ಮಾ| ಬಾ| ರೋಬರ್ಟ್ ಮಿರಾಂದಾ.

1996-ಂತ್ ಮಾ| ಬಾ| ರೋಬರ್ಟ್ ಮಿರಾಂದಾ ಆತಾಂ ಗುಲ್ಬರ್ಗ ದಿಯೆಸೆಜಿಚೊ ಬಿಸ್ಪ್ ಆಮ್ಚ್ಯಾ ಫಿರ್ಗಜೆಕ್ ಆಯ್ಲೆ. ಇಗರ್ಜೆಕ್ ನವ್ಯಾನ್ ಫ್ಲೊರಿಂಗ್, ನವೆ ಬಾಂಕ್, ನವೆಂ ಶೌಚಾಲಯ್, ಫಾತ್ರಾಂಚೊ ದೊರೊ, ಏಕ್ ನವಿ ಸ್ಟೇಜ್ ಹಿಂ ಸರ್ವ್ ಕಾಮಾಂ ಎಕಾ ಪಾಟ್ಲ್ಯಾನ್ ಏಕ್ ಜಾಲಿಂ. ಸಾಂಗಾತಾಚ್ ದೆ| ಶ್ರೀ ಎಡ್ಗರ್ ಮೊಂತೇರೊಚ್ಯಾ ಉದಾರ್ ಪಣಾನ್ ಕಲ್ವಾರಿಚೆ ಜೆಜುನ್ ಖುರ್ಸಾರ್ ಉಮ್ಕಾಳೊನ್ ಆಸ್ಚೆಂ ವ್ಹಡ್ ದೃಶ್ಯ್ ಇಗರ್ಜೆ ಮುಕಾರ್ ಉಭೆಂ ಜಾಲೆಂ.

1997-2004 ಮಾ| ಬಾ| ಆಂಡ್ರ್ಯೂ ಲಿಯೋ ಡಿಸೋಜಾ.

ಮಾ| ಬಾ| ಆಂಡ್ರ್ಯೂ ಲಿಯೋ ಡಿಸೋಜಾನ್ ತಾಂಚಾ ಆವ್ದೆಂತ್ ಇಗರ್ಜೆಚಾ ತೆನ್ಕಾ ಕುಶಿಲೊ ದೊರೊ ಬಾಂಧಯ್ಲೊ. ಬೋವ್ ಪರ್ನೆಂ ಆಸ್ಲ್ಲೆಂ ವಿಗಾರಾಚೆಂ ಘರ್ ನವ್ಯಾನ್ ಬಾಂದ್ಲೆಂ. ತ್ಯಾ ನಂತರ್ ವಿಗಾರಾಚ್ಯಾ ಘರಾಚ್ಯಾ ಪಯ್ಲ್ಯಾ ಫ್ಲೋರಾಚೆರ್ ಏಕ್ ಲ್ಹಾನ್ ಶೆಂ ಮಿನಿ ಸಭಾಸಾಲ್ ಬಾಂದ್ಲೆಂ. ಫಿರ್ಗಜೆಕ್ ಪಾಲೊಟಾಯ್ನ್ ಆನಿ ದೊಮಿನಿಕಾನ್ ಕೊವೆಂತಾಂಚಾ ಸಿಸ್ಟ್ರಾಂಕ್ ಹಾಡಯ್ಲೆಂ. ಅಮ್ಚ್ಯಾ ಫಿರ್ಗಜ್ ಗಾರಾಂಚಿ ಆಶಾ ಜಾವ್ನಾಸ್ಲ್ಲಿ ಏಕ್ ಇಸ್ಕೊಲ್ ಜಾಯ್ಜೆ ಮ್ಹಣ್. ತಾಂಚಾ ಮಿನತೆನ್ ಇನ್ಫೆಂಟ್ ಜೀಸಸ್ ಆಂಗ್ಲ ಮಾಧ್ಯಮ್ ಇಸ್ಕೊಲ್ 1998ವೆರ್ ಉಬೆಂ ಜಾಲೆಂ. ಇಸ್ಕೊಲಾಕ್ ಗರ್ಜ್ ಆಸ್ಚೆ ಶೌಚಾಲಯ್ ಬಾಂದಯ್ಲೆ. ಕಿಂಡರ್ -ಗಾರ್ಡನ್ ಆನಿ ಇಸ್ಕೊಲಾಕ್ ನವಿ ಸ್ಟೇಜ್ ನಿರ್ಮಾಣ್ ಕೆಲಿ. ಇಸ್ಕೊಲಾಕ್ ಖೆಳಾ ಮೈದಾನಾಚಿ ಗರ್ಜ್ ಆಸಾ ದೆಕುನ್ ಸಿಮೆಸ್ತ್ರ್   ಸ್ಥಳಾಂತರ್ ಕರ್ನ್ ಖೆಳಾ ಮೈದಾನ್ ಆಸಾ ಕೆಲೆಂ. ಲ್ಹಾನ್ ಕ್ರಿಸ್ತಾಂವ್ ಸಮುದಾಯ್ ವಾಡ್ಯಾವಾರ್ ರಚನ್ ಕೆಲೆಂ. ಕ್ರಿಸ್ಮಸ್ ಟ್ಯಾಬ್ಲೊ ಸಾರ್ವಜನಿಕ್ ಕರ್ನ್ ಕ್ರಿಸ್ತಾಚೊ ಸಂದೇಶ್ ಸರ್ವಾಂಕ್ ಪಾವಾಶೆಂ ಆನಿಂ ಪಯ್ಲೆಂ ಪಾವ್ಟಿಂ ಸರ್ವ ಧರ್ಮ ಸಮ್ಮೇಳ್ ಆಸಾ ಕೆಲ್ಲಿ ಕೀರ್ತ್ ಹಾಂಕಾ ಫಾವೊ ಜಾತಾ.

2004-2005 ಮಾ| ಬಾ| ಆರ್ಚಿಬಾಲ್ಡ್ ಆಲ್ಬುಕರ್ಕ್.

ಏಕ್ ಚ್ ವರಸ್ ಸೆವಾ ದಿಲ್ಯಾ ದೆ| ಮಾ| ಬಾ| ಆರ್ಚಿಬಾಲ್ಡ್ ಆಲ್ಬುಕರ್ಕ್ ಬಾಪಾನಿಂ ಅತ್ಮೀಕ್  ಸಂಗ್ತಿಂಕ್ ಚಡ್ ಮಹತ್ವ್ ದಿಲಾ.

2005-2012 ಮಾ| ಬಾ| ಹೆರಾಲ್ಡ್ ಮಸ್ಕರೇನ್ಹಸ್.

ಮಾ| ಬಾ| ಹೆರಾಲ್ಡ್ ಮಸ್ಕರೇನ್ಹಸ್ ಬಾಪಾನಿಂ ಹರ್ಯೆಕಾ ಕುಟ್ಮಾಂಚಿ ಭೆಟ್ ಕರ್ನ್ ತಾಂಚೆ ಕಷ್ಟ್-ದೂಖ್ ಸಮ್ಜಾಲ್ಲೊ ಯಾಜಕ್ ಜಾವ್ನಾಸಾ. ಶಿಕ್ಪಾ ಕುಮ್ಕೆ ಯೋಜನ್, ಪಿಡೆಸ್ತಾಂಕ್ ಆರ್ಥಿಕ್ ಕುಮೊಕ್, ದುಬ್ಳ್ಯಾಂಕ್ ದುಡ್ವಾ ಕುಮೊಕ್, ಪ್ರಾಚಿತ್ ಕಾಳಾರ್ ಉರೊವ್ಣಿ ಕರ್ನ್ ಮೊಗಾ ಸೆವಾ ದಾನ್ ಜಮೊ ಕರ್ಚೆಂ ಯೋಜನ್ ಜಾರಿ ಕೆಲಾಂ. ಫಿರ್ಗಜೆಂತ್ಲೆ ಹರ್ಯೆಕ್ ಸಂಘ್-ಸಂಸ್ಥೆ ಜಿವಾಳ್ ಆಸಾಶೆಂ ಕೆಲ್ಯಾತ್. ಫಿರ್ಗಜೆಚಾ ಲೊಕಾ ಥಂಯ್ ಲಿಪೊನ್ ಆಸ್ಲ್ಲಿಂ ತಾಲೆಂತಾಂ ಊರ್ಜಿತ್ ಕರುಂಕ್ “ಮರ್ಸಿಮಾಯೆಚೆಂ ಜಯ್ತ್” ಪತ್ರ್ ಪರ್ಗಟ್ ಕೆಲಾಂ. ಇನ್ಫೆಂಟ್ ಜೀಸಸ್ ಇಸ್ಕೊಲಾಚಾ ದುಸ್ರ್ಯಾ ಮಾಳಿಯೆಚೆಂ ಕಾಮ್ ಪೊಂತಾಕ್ ಪಾವಯ್ಲಾಂ. ವಾಡ್ಯಾವಾರ್ ವಿವಿಧ್ ಸ್ಪರ್ಧೆ ಮಾಂಡುನ್ ಹಾಡ್ಲ್ಯಾತ್. ಹಾಂಚ್ಯಾ ಮಿನ್ಹತೆನ್ ಹೊಸಂಗಡಿ ಉದಯನಗರಾಂತ್ ಆಸ್ಲೆಂ ಉದಯ್ ಇಂಗ್ಲಿಷ್ ಮಿಡಿಯಂ ಇಸ್ಕೊಲ್ ಕಥೊಲಿಕ್ ವಿದ್ಯಾ ಮಂಡಳೆನ್ ಮೊಲಾಕ್ ಘೆಂವ್ಕ್ ಕಾರಣ್ ಜಾಲೆಂ. ಇಗರ್ಜೆಕ್ ನವ್ಯಾ ಬಾಂಕಾಂಚೆ ವ್ಯವಸ್ಥಾ, ಏಕ್ ನವಿ ಬೋರ್, ಇಗರ್ಜೆ ಪಾಟ್ಲೊ ಜಾಗೊ ಸಮತಟ್ಟ್ , ಇಗರ್ಜೆಚಾ ಆನಿ ಇಸ್ಕೊಲಾಚಾ ಭಂವ್ತಿಂ ಫುಲಾಂ ತೋಟ್, ನಿತಳಾಯ್, ಕೃಷಿ ಅಶೆಂ ಸಭಾರ್ ಬರಿಂ ಕಾಮಾಂ ಕೆಲ್ಯಾಂತ್ . ಶಿಕ್ಪಾಂತ್ ಪಾಟಿಂ ಆಸ್ ಲ್ಲ್ಯಾ ಭುರ್ಗ್ಯಾಂಕ್ ಶಿಕೊಂಕ್ ವಿಗಾರಾಚ್ಯಾ ಘರಾ ವಯ್ರ್ ಹಾಸ್ಟೆಲ್ ಬಾಂದಲ್ಲಿ ಕೀರ್ತ್ ಹಾಂಕಾ ಫಾವೊ ಜಾತಾ. ಮನ್ಜಾತಿಂಚೊ ವಿಶೇಷ್ ಮೋಗ್ ಆಸ್ಲೊ ಯಾಜಕ್ ಜಾವ್ನಾಸ್ಲ್ಲೊ.

2012-2019 ಮಾ| ಬಾ| ವಲೇರಿಯನ್ ಲೂವಿಸ್.

ಹರ್ಯೆಕಾ ಕುಟ್ಮಾಂಚಿ ಭೆಟ್ ಕರ್ನ್ ಕುಟ್ಮಾಂಚಿ ಪರಿಸ್ಥಿತಿ ಸಮ್ಜೊನ್ ಘೆತ್ಲಿ. ಲ್ಹಾನ್ ಕ್ರಿಸ್ತಾಂವ್ ಸಮುದಾಯ್ ಜಿವಾಳ್ ಕರ್ನ್ ವಾಡ್ಯಾಂತ್ ಎಕ್ವಟ್, ಮಾಯಾಮೋಗ್ ಚಡಯ್ಲೊ. ವಾಡ್ಯಾಚಿಂ ಫೆಸ್ತಾಂ ಆಸಾ ಕರ್ನ್ ಎಕ್ವಟಾಚೊ ಬಾಂಧ್ ವಾಡಯ್ಲೊ. ಲೊಕಾಚೊ ಭಾವಾರ್ಥ್ ವಾಡಂವ್ಚಾಕ್ ಆಯ್ತಾರಾಚಿ ದೇವ್ ಸ್ತುತಿ, ಆರಾಧನ್, ಅಶೆಂ ಸರ್ವಾ೦ನಿ ಎಕಾ ಕುಟ್ಮಾ ಭಾಷೆನ್ ಜಿಯೆಂವ್ಚಾಕ್ ಆಧಾರ್ ದಿಲೊ. ಇನ್ಫೆಂಟ್ ಜೀಸಸ್ ಇಸ್ಕೊಲಾಚಾ ಹೊಲಾಚೆಂ ಕಾಮ್ ಪೊಂತಾಕ್ ಪಾವಯ್ಲೆಂ. ಇಗರ್ಜೆಚೊ ಆದಾಯ್ ಚಡಂವ್ಚಾಕ್ ಮಾಡಾ ಕವಾತೆ ಲಾಯ್ಲೆ. ಪರಿಸರ್ ಪಾಚ್ವೆಂ ದವರ್ಚಾಕ್ ಸಾಗ್ವೊಣೆಚಿಂ ಝಾಡಾಂ ಲಾಯ್ಲಿಂ.

ಲೊಕಾಚಿ ಆಶಾ ಅಸ್ ಲ್ಲಿ ಫಿರ್ಗಜ್ 100 ವರ್ಸಾಂ ಸಂಪಾಂವ್ಚ್ಯಾ ಸಂದರ್ಭಾರ್ ಹಾಂಗಾಸರ್ ಏಕ್ ನವಿ ಇಗರ್ಜ್ ಜಾಯ್ಜೆ ಮ್ಹಣ್.  ಜಾಯ್ತೆಂ ಚಿಂತಾಪ್ ಆಟಯ್ಲ್ಯಾ ಉಪ್ರಾಂತ್ ಸರ್ವ್ ಕುಟ್ಮಾಂಚಿ ಸಮೀಕ್ಷಾ ಕರ್ನ್ ಲೊಕಾಚಿ ಅಭಿಪ್ರಾಯ್ ಘೆತ್ಲ್ಯಾ ಉಪ್ರಾಂತ್ ನವಿ ಇಗರ್ಜ್ ಬಾಂದುಂಕ್ ಯೋಜನ್ ಘಾಲೆಂ.

ನವ್ಯಾ ಇಗರ್ಜೆಕ್ ಬುನ್ಯಾದಿ ಫಾತೊರ್ 01-01-2017ವೆರ್ ಅ| ಮಾ| ದೊ| ಎಲೋಶಿಯಸ್ ಪಾವ್ಲ್ ಡಿಸೋಜ, ಗೊವ್ಳಿ ಬಾಪ್ ಹಾಣಿಂ ಆಶೀರ್ವಾದಿತ್ ಕರ್ನ್ ದವರ್ಲ್ಲೊ. 2017 ಮೇ ಮಹಿನ್ಯಾಚ್ಯಾ 22 ತಾರಿಕೆರ್ ಶತಮಾನೋತ್ಸವ್ ವರ್ಸಾಚೆಂ ಉದ್ಗಾಟನ್ ಕೆಲೆಂ. ನವ್ಯಾ ಇಗರ್ಜೆಚೆಂ ಯೋಜನ್ ದೆವಾಚಾ ಆಧಾರಾನ್ ಪಾತ್ರೊನ್ ಮರ್ಸಿ ಮಾಯೆಚಾ ಮಜತೆನ್ ಸರ್ವ್ ಲೊಕಾಚಾ ಆನಿ ದಾನಿಂಚಾ ಸಹಕಾರಾನ್ ಶತಮಾನೋತ್ಸವಾಚೆಂ ಸ್ಮಾರಕ್ ಜಾವ್ನ್ 2018ವ್ಯಾ ಮೇ ಮಹಿನ್ಯಾಚ್ಯಾ 22 ತಾರಿಕೆರ್ ಆಶೀರ್ವಚನ್ ಜಾಲೆಂ. 

2019 ಮೇ 1 ತಾರಿಕೆರ್ ಶತಮಾನೋತ್ಸವ್ ಸಂಪವ್ಣಿ ಕಾರ್ಯೆಂ ವ್ಹಡಾ ಸಂಭ್ರಮಾನ್ ಮಾಂಡುನ್ ಹಾಡ್ಲೊ. ತೊಡ್ಯಾಚ್ ದಿಸಾನಿಂ 2019 ಮೇ 27ವೆರ್ ಮಾ| ಬಾ| ವಲೇರಿಯನ್ ಲೂವಿಸ್  ಹಾಂಕಾ ತಾಂಚಿ ಯಶಶ್ವಿಚಿ ಸಾತ್ ವರ‍್ಸಾಂ ಸಂಪವ್ಣ್ ಕಾಟಿಪಳ್ಳಾ ಫಿರ್ಗಜೆಕ್ ವರ್ಗ್ ಜಾಲೊ. ಭೋವ್ ಮಜ್ಭೂತ್ ಆನಿ ಆಕರ್ಷಿತ್ ಇಗರ್ಜ್ ಬಾಂದ್ ಲ್ಲಿ ಕೀರ್ತ್ ಹಾಂಕಾ ಫಾವೊ ಜಾತಾ. 

 2019-2022 ಮಾ| ಬಾ| ವಿನ್ಸೆಂಟ್ ವಿನೋದ್ ಸಲ್ಡಾನ. ·

2019 ವೆರ್ ಅಯಿಲ್ಲ್ಯಾ ಮಾ| ಬಾ| ವಿನ್ಸೆಂಟ್ ವಿನೋದ್ ಸಲ್ಡಾನಾ ಹಾಣಿಂ ಫಿರ್ಗಜೆಂತ್  ಆಧ್ಯಾತ್ಮಿಕ್ ಸಂಗ್ತಿಕ್ ತಶೆಂಚ್ ಸಂಘ್ ಸಂಸ್ಥ್ಯಾಂಚ್ಯಾ ವಾಡವಳೆಕ್ ಮಹತ್ವ್ ದಿಲೊ. ಇನ್ಫೆಂಟ್ ಜೀಸಸ್ ಇಸ್ಕೊಲಾಕ್ ನವೆಂ ಬ್ಲಾಕ್ , ಇಸ್ಕೊಲಾಚ್ಯಾ ಹರ್ಯೇಕಾ ಪ್ಲೋರಾಕ್ ಶೌಚಾಲಯ್ ವ್ಯವಸ್ಥಾ ಕೆಲಿ. ಮಾ| ಬಾ| ವಿನ್ಸೆಂಟ್ ವಿನೋದ್ ಸಲ್ಡಾನಾ  ಹಾಣಿಂ ಫಿರ್ಗಜೆಂತ್ ತೀನ್ ವರ್ಸಾಂ ಸೆವಾ ದಿಲಿ.

2022-ಥಾವ್ನ್  ಮಾ| ಬಾ| ಎಡ್ವಿನ್ ಫ್ರಾನ್ಸಿಸ್ ಪಿಂಟೊ.

2022 ಮೇ 19 ವೆರ್ ಅಯಿಲ್ಲ್ಯಾ ಮಾ| ಬಾ| ಎಡ್ವಿನ್ ಫ್ರಾನ್ಸಿಸ್ ಪಿಂಟೊ ಹಾಣಿಂ ಇಸ್ಕೊಲಾಚ್ಯಾ ನವ್ಯಾ ಬ್ಲೊಕಾಚೆಂ ಕಾಮ್ ಪೊಂತಾಕ್ ಪಾವವ್ನ್ 2022 ಆಗಸ್ಟ್ ಮಹಿನ್ಯಾಂತ್ ಮಂಗ್ಳುರ್ ಬಿಸ್ಪ್ ಹಾಂಚೆ ಥಾವ್ನ್ ಉದ್ಘಾಟನ್ ಕೆಲೆಂ. . ಇಗರ್ಜೆಚ್ಯಾ  ಘಂಟಿಕ್ ಸ್ವಯಂ ಚಾಲಿತ್ (automatic pulsator) ಬಸೊಂವ್ಚಿ ವ್ಯವಸ್ಥಾ ಕೆಲಿ. ಇಗರ್ಜೆಚೆಂ ಆದ್ಲೆಂ ಕಾಂಪ್ಲೆಕ್ಸ್ ಮೋಡ್ನ್ ಆಧುನಿಕ್ ಶೈಲೆರ್ ನವೆಂಚ್ ಕೊಂಪ್ಲೆಕ್ಸ್ ಬಾಂದುನ್ ಇಗರ್ಜೆಕ್ ಆದಾಯ್ ಯೆಂವ್ಕ್ ಕಾರಣ್ ಜಾಲ್ಯಾತ್. 2023 ಚ್ಯಾ ನವೆಂಬರ್ ಮಹಿನ್ಯಾಂತ್ ಇನ್ಫೆಂಟ್ ಜೀಸಸ್ ಇಸ್ಕೊಲಾಚೊ   Silver Jubilee ಆಚರಣ್ ಕೆಲೊ. ಫಿರ್ಗಜೆಂತ್ ಆರ್ಥಿಕ್ ಜಾವ್ನ್ ಪಾಟಿಂ ಅಸ್ಲ್ಯಾ ಅತೀ ಗರ್ಜೆವಾಂತಾಂಕ್ ಘರ್ ಬಾಂದ್ಚೆಂ ಯೋಜನ್ ಜಾರಿಂ ಕೆಲೆಂ. ಅಶೆಂ ಎದೊಳ್ ಸಾತ್ ನವಿಂ ಘರಾಂ ಬಾಂದುನ್ ದಿಲ್ಲಿ ಕೀರ್ತ್ ಹಾಂಕಾಂ ಫಾವೊ ಜಾತಾ. ಹೆಂ ಯೋಜನ್ ಅನಿಕೀ ಮುಕಾರುನ್ ವೆತೆಲೆಂ ಮ್ಹುಲ್ಲೊ ಭರ್ವಾಚೊ ಆಮಾ ಸರ್ವಾಂಚೊ.

ಫಿರ್ಗಜೆಂತ್  ಚಲ್ಚಿಂ ಸರ್ವ್ ನವಿಂ ಕಾಮಾಂ  ಫಿರ್ಗಚ್ಯಾ ನವ್ಯಾ ಇತಿಹಾಸಕ್ ಪೂರಕ್ ಜಾವ್ನ್ ಅಸಾತ್ ಮ್ಹುನ್ಟ್ಯಾಕ್ ಕಾಂಯ್ ಚ್ ದುಬಾವ್ ನಾ.